حساب الشباب من بنك الإسكندرية: مميزاته وشروط فتح الحساب بالتفصيل

لو كنت شاب في مصر وتفكر تفتح حساب بنكي يساعدك في إدارة فلوسك بسهولة، حساب الشباب من بنك الإسكندرية يعتبر من أقوى الاختيارات اللي ممكن تبدأ بيها. وده جزء من سلسلة بقدمهالك عن حسابات الشباب في البنوك المصرية، واللي كنت اتكلمت فيها قبل كده عن حساب شباب بنك مصر والبنك الأهلي المصري. لو شايف إن السلسلة دي مفيدة ليك، قولي أكمل فيها وهكمل على باقي الحسابات المتاحة في مصر.

لا تنسي الأشتراك في قناتنا علي اليوتيوب ليصلك كل جديد - اشترك الأن مجانا

لا تنسي الاشتراك في قناتنا علي التليجرام - اشترك الان

مميزات حساب شباب بنك الإسكندرية

أول ميزة بتشدك في الحساب ده إنك تقدر تفتحه من سن 15 سنة لحد 25 سنة باستخدام بطاقتك الشخصية فقط، من غير ما تحتاج أي وصي قانوني، وده بيخلي الأمر بسيط جدًا وسهل لأي شاب لسه في بداية حياته.

كلامي هنا معتمد بالكامل على الموقع الرسمي لبنك الإسكندرية، عشان كده كل المعلومات دقيقة ومحدثة.

شروط فتح الحساب

• الحد الأدنى لفتح الحساب: 50 جنيه مصري.
• الحد الأدنى لاحتساب العائد: 250 جنيه مصري.

لكن ومن خلال تجارب ناس كتير، أنصحك تبدأ بمبلغ يتراوح ما بين 500 إلى 1000 جنيه. الفلوس دي مش رسوم، دي رصيد بيتساب في حسابك وتقدر تسحبه في أي وقت تحب، بس الهدف إنك تضمن وجود مبلغ كافي لتغطية المصاريف الإدارية اللي هنتكلم عنها كمان شوية.

فتح الحساب نفسه مفيش عليه رسوم، لكن يُفضل يكون معاك حوالي 50 جنيه احتياطي لرسوم الدمغة أو أي مصاريف بسيطة تانية ممكن يطلبوها منك وقت التقديم، حسب الفرع.

الرسوم الإدارية

فيه رسوم إدارية شهرية ثابتة وهي:

• 10 جنيه شهريًا، يعني تقريبا 30 جنيه كل 3 شهور.

عشان كده بقولك تسيب مبلغ مناسب في الحساب يغطي الخصومات دي، خصوصًا لو مش بتستخدم الحساب بشكل منتظم.

احتساب العائد

لو ناوي تحط مبلغ وتسيبه، اعرف إن الحد الأدنى اللي البنك بيبدأ منه احتساب الأرباح هو 250 جنيه. يعني لو عندك مبلغ ثابت في الحساب، هينزل عليه عائد دوري.

بطاقة فيزا الشباب من بنك الإسكندرية

من المميزات القوية في الحساب ده إنه بيقدملك بطاقة فيزا خصم مباشر للشباب، وده شكلها حسب الموقع الرسمي. البطاقة دي لها:

• رسوم إصدار: 50 جنيه.
• رسوم سنوية: 50 جنيه (بتبدأ من السنة التانية).
• حدود المشتريات اليومية فيزا شباب بنك اسكندرية 250 الف جنيه.
• حدود السحب النقدي من ماكينات atm يوميا هو 30 الف جنيه.
• رسوم السحب من ماكينات غير تابعة لبنك اسكندرية هو 5 جنيه للمعاملة الواحدة.

يعني كل سنة هيتخصم من حسابك 50 جنيه تلقائيًا لو الفيزا مفعّلة.

سهولة الربط بـ Instapay

من الحاجات اللي تميز الحساب إنك تقدر تربطه بإنستاباي من غير أي مشاكل، وده بيسهّل عليك التحويلات والاستقبال الفوري للأموال من أي بنك تاني.

كمان الحساب بيجيلك معاه:

• رقم IBAN
• سويفت كود (SWIFT Code)

وده معناه إنك تقدر تستقبل حوالات من أي دولة في العالم بسهولة

هل الفيزا بتشتغل دولي؟

الإجابة باختصار: لأ.

كل بطاقات الخصم المباشر في مصر حاليًا مش شغالة دولي، وده بينطبق على بطاقة فيزا بنك الإسكندرية كمان. بمعنى إنك تقدر تستخدم البطاقة:

• داخل مصر
• أونلاين على المواقع المصرية فقط

لكن مش هتقدر تستخدمها للشراء من مواقع أو متاجر خارج مصر أو في أي عمليات دولية.

حمل تطبيق ALEXBANK Mobile Banking وتمتع بخدمات بنكية متكاملة من موبايلك

لو كنت من عملاء بنك الإسكندرية، أو بتفكر تبقى واحد منهم، تطبيق ALEXBANK Mobile Banking هيسهل عليك كل تعاملاتك البنكية من غير ما تضطر تروح الفرع أو تكلم خدمة العملاء. التطبيق بيقدملك مجموعة كبيرة من المزايا اللي هتخليك تدير كل حساباتك من موبايلك في أي وقت وبكل سهولة وأمان.

تسجيل دخول سريع وآمن

أول ما تحمل التطبيق، تقدر تسجل الدخول بكل سهولة عن طريق موقع بنك الإسكندرية الإلكتروني. وبعد التسجيل، هتقدر تفتح التطبيق في ثواني باستخدام بصمة الإصبع أو ميزة التعرف على الوجه (الميزة دي متاحة فقط لمستخدمي أجهزة iOS). ده بيوفرلك تجربة استخدام سلسة وآمنة بدون الحاجة لإدخال البيانات كل مرة.

ربط شهادات الادخار والودائع من غير زيارة الفرع

من أهم مميزات التطبيق إنك تقدر تربط شهادات الادخار أو تفتح ودائع مباشرة من خلال تطبيق الموبايل البنكي أو الإنترنت البنكي، من غير ما تزور الفرع. كل العمليات دي بتتم بخطوات بسيطة، وبتحافظ على أعلى مستويات الأمان.

تحويلات مرنة وسداد فواتيرك بكل سهولة

سواء كنت عايز تحوّل بين حساباتك الشخصية، أو تبعت فلوس لأي حساب تاني داخل أو خارج البنك، التطبيق بيتيحلك تعمل ده بسهولة باستخدام رابط رمز الأمان. كمان تقدر تسدد فواتيرك الشهرية أو تحول لأي محفظة إلكترونية داخل مصر مباشرة من التطبيق، من غير ما تحتاج تطبيقات تانية.

إعادة تفعيل التطبيقات بسهولة

لو حصل أي مشكلة في تطبيق ALEXBANK Mobile Banking أو تطبيق O-Key، مش هتحتاج تتصل بمركز خدمة العملاء. تقدر ببساطة تعيد تفعيلهم من خلال التطبيق نفسه بخطوات واضحة وسريعة، وده بيوفر عليك وقت وجهد.

مشاركة بيانات حسابك بكل سهولة

لو محتاج تبعت رقم حسابك لأي جهة أو شخص، تقدر تشارك البيانات البنكية الخاصة بيك، بما فيها رقم الحساب الدولي IBAN، بكل سهولة من خلال:

• رسائل نصية SMS
• تطبيق واتساب
• البريد الإلكتروني

الميزة دي بتخلي مشاركة بيانات حسابك أسرع وأسهل، خصوصًا في معاملاتك اليومية أو في استلام التحويلات من جهات مختلفة.

هل الحساب يستاهل؟

من وجهة نظري، لو في فرع بنك إسكندرية قريب منك، روح وافتح الحساب. مفيش أي خسارة، بالعكس، هتلاقي نفسك مع الوقت بتبدأ تبني علاقة بنكية، وتقدر تستخدم الحساب بحرية، وتتمتع بأبسط شكل من أشكال الاستقلال المالي.